كلمات من مسرحيه خيبتنا
فيها ايجاز عن لماذا قام الشباب بهذه الثوره؟
يا ريت الكل يقراها
انا مصرى ايوه انا مصرى ايه الغريب فى كده؟!!
انا مصرى والله مصرى انتو ليه مش مصدقين !!
انا بمشى جمب الحيط و مبفتحش بوقى
عرفتو بقى انى مصرى...
انا ماليش راى و مش حر وماليش حق
صدقتو بقى انى مصرى...
انا خواف و جبان و بخاف من الحكومه و الصهاينه والامريكان
ابقى ايه .. ابقى مصرى...!!
انا مبقتش عروبى ولا قومى هما عايزنى شرق اوسطى
لا ليا دعوه ب اخويا ولا ابن عمى
انا بحجز بس
ابقى ايه...اكيد انا مصرى...!!!
انا مبقاش يهمنى فولان سرق ولا علان نهب
ولا يهمنى انسان ظلم او اتظلم
انا ميهمنيش الاسعار تبقى نار بسكت لا بنكت ولا بهرى
ها مش كده ابقى مصرى ...!!!!
انا شايف السرقه والغش والرشوه
والوث ميه النيل ب اديا ولا اختشى
ايقنتو دلوقتى ان انا مصرى...!!!
انا قوى وبستحمل و بستعبط وبسوق الهبل
واسوق لحد اسكندريه فى ساعتين
واروح مشوار لحد وسط البلد فى 4 ساعات
عشان موكب سيدنا و تاج راسنا واللى انضف مننا!!!!
والله العظيم انا مصرى
عليا الطلاق بالتلاته انا مصرى
وطول عمرى عايش فى مصر يبقى انا مصرى
لان مصرهيا بلدى
مصرى يعنى مصر دى كلها بتاعتى
والله العظيم انا مصرى
لاء............
استغفر الله العظيم كنت هاكدب
انا مش مصرى
لان مصر ما بقتش بتاعتى
مصر كدبتنى و خونتنى
هدتنى وشحتتنى
قهرتنى و كممتنى
وطرشتنى و استعمتنى
طب و كتاب الله
ايه.........هوا انهى كتاب؟!!!
انا نسيت
اصل الحكومه كمان كفرتنى ...
وهيا دى خبيتنا
محمد صبحى
الجمعة 25 يناير 2013, 3:06 am
